బొమ్మ బొరుసు

ఓం శ్రీ సాయిరాం

బొమ్మ బొరుసు (కవిత)

నిజానికి అవి బొమ్మ బొరుసులు

బ్రతుకు నాణానికి...

అయినా అవి జీవితాన్ని నడిపిస్తాయి

నాణెం లోకాన్ని నడిపించినట్లు

***

నిజానికి అవి బొమ్మ బొరుసులే...కానీ

కంటికి కనిపించని వెలుగు నీడలు

జీవితానికి ఎత్తుపల్లాలు

కాల చక్రంతో కలిసినడిచినా

ఒకదానికొకటి ఎదురుపడవు

ఎందుకంటే అవి పాదాల్లాంటివి

పక్కపక్కనే నిలబడ్డా

ఒకదాని వెనకే ఒకటి

రేయింబవళ్ళలా జతపడవు కానీ

ఏ ఒక్కటి లేకపోయినా బ్రతుకు తెలవారదు

*** 

నిజానికి అవి బొమ్మ బొరుసులే...అయినా

అమావాస్య చంద్రుడులా ఒకటి

వసంత భానుడిలా మరొకటి

వంచించినా...వరించినా

నేర్పేది పాఠాన్నే...దిద్దేది జీవితాన్నే

అందుకే అవి నాణానికి బొమ్మాబొరుసులు

బ్రతుకులో కష్టసుఖాలు

అవే మన జీవన ప్రమాణాలు

*** 

రచన

రెడ్లం చంద్రమౌళి

పలమనేరు