ఓం శ్రీ సాయిరాం
విరహ గీతం
పల్లవి:
చిన్నారి సిరిమల్లీ ఎందుదొ జాబిల్లీ
తనజాడ తెలిసే మార్గం చూపించవే
ఇన్నినాళ్ళు ఊరుకుంది వయసు
మౌనమింక సాగదంది మనసు
హెచ్చరికలంపె నాకు ఇపుడు
దారిచెప్పి నీవు సాయపడరావా
నెలరాజా... రాజా... రాజా...
||చిన్నారి సిరిమల్లీ||
చరణం:1
తన్నుతానుగా అందిరాదుగా మనకై చంద్రమా
వద్దచేరి నా విరహవేదన నీవే తెలుపుమా
అదిరి పోవునో బెదిరి పోవునో నిన్నే చూడగా
కుసుమ కోమలి కుశల మడిగి నా మనసే చెప్పుమా
శ్వాసలో శ్వాసనై చేరే వేళకై
ఆశగా ఆమెకై వేచున్నానని
విన్నపాలు విని నన్ను చేరమని విన్నవించి రావా
||చిన్నారి సిరిమల్లీ||
చరణం:2
సగము తానుగా సగము నేనుగా కలిసేదెప్పుడో
జీవితాన నా చేయిపట్టుకొని నడిచేదెెప్పుడో
పాలు నీళ్ళలా పదము భావమై కలిసేదెప్పుడో
అడుగు అడుగునా తోడు నీడగా నడిచేదెప్పుడో
మనసులో మనసువై చేరే నా చెలి
బ్రతుకులో జంటగా తోడుంటావని
తెలుగు భాషలో తీర్చి కూర్చినా తీయనైన లేఖ
||చిన్నారి సిరిమల్లీ||
రచన
రెడ్లం చంద్రమౌళి
పలమనేరు