చేయి అందించి మన ప్రేమ గెలిపించవ

ఓం శ్రీ సాయిరాం

చేయి అందించి మనప్రేమ గెలిపించవ

పల్లవి:

నీలాల నింగిలో చందమామ

నీ కొరకై వేచెను ఈ కలువ భామ

వెన్నెల వీడి నన్ను చేరగ రావ

కలిసెదము హృదయముల వ్యధలు తీర్చగ

||నీలాల||

చరణం:1

సఖా లాలించే పాటవై రావా

నన్ను మురిపించే మాటవైపోవా

నిన్ను చేరే క్షణం ప్రేమ పులకించదా

తీపి అధరాల రుచి చూడ భాగ్యమీయవా

||నీలాల||

చరణం:2

నీలి మేఘాల కబురంప లేద

కోటి రాగాల ఉయ్యాలలూగ

రేయి స్వప్నాలను నన్ను వేధించక

చేయి అందించి మనప్రేమ గెలిపించవ

||నీలాల||

--రెడ్లం చంద్రమౌళి

పలమనేరు

 

కలనైన నిజమైన విడిపోనిది

ఓం శ్రీ సాయిరాం

కలనైన నిజమైన విడిపోనిది

తేది:14-08-2016

పల్లవి:

మా క్లాసులోన ఒక తుంటరీ చేసేను తెగ అల్లరి

విరజాజులన్నీ చిరినవ్వులై విరిసేను అధరాలపై

మదికీనాడు గుర్తొచ్చె ఇది ఎందుకో

అతనీనాడు జన్మించె మరియందుకే

మన స్నేహాలు విడిపోవు ఏనాటికి

మనమేనాడు కలిసేమొ ఒక చోటికి

చిరు ప్రాయంలో చిగురించినది 

అది కలనైన నిజమైన విడిపోనిది

||మా క్లాసులోన||

చరణం:1  

కులమేదైనా కలిసుంటాము

ఒకరికి ఒకరై తోడుగ నిలచి

కుదురుగ లేని తుంటరి వయసు

తమకంలోన చేసే గాయం

శ్రుతి మించి రాగాన పడుతుండగా

మన స్నేహాలు చెరిపేను ఆ గాయము

||మా క్లాసులోన||

చరణం:2

దూరాన్నున్నా విడిపోలేదు 

ముఖ పుస్తకమై దరిచేరాము

కాలంతోనే పరుగెడుతున్నా

ప్రతి విషయాన్ని పంచే మార్గం

ఈ మెయిల్ ట్విట్టరు వాట్సప్ లై

మన స్నేహాన్ని కలిపేను ఈనాడిలా 

||మా క్లాసులోన||

--రెడ్లం చంద్రమౌళి

పలమనేరు

అతిశయోక్తి గాదే ఇది అమరప్రేమ

   ఓం శ్రీ సాయిరాం

అతిశయోక్తి గాదే ఇది అమరప్రేమ

 కవిత

కాలమాగలేదు కవిత చెప్పుదునన్న

మనసు మరువలేదు మదిని నిన్ను

శిలను చేసినావు చెలిమి వీడుచు నేడు

చీకటాయె బ్రతుకు చెలియ లేక

 ***

అడుగులేసి నాను అర్థమ్ము తెలియక

వలపు తలపులలోన తడిచి తడిచి

వలచినప్పుడు లేదు విరహతాపము నాడు

విడిచినప్పుడు ఏల తెలియ వలయు

 ***

విడువ మనసు రాక విడిచి నెంచితి నేను

యదను రేపిన గాయమణచలేక

వలపు ఊయలలూపి వేరు మనమున జేరి

అంతరంగము నేల అమరినావు

చెరపలేకపోతి చేరిన హృదయాన్ని

మనసు తలుపులు మూసి విడువలేక

 ***

ఉన్న వూరు గాదే విడువక వద్దునన్న

కన్న భూమి గాదే కలిసి వచ్చునన్న

కులము ఒక్కటి గాదే కుదిరి వచ్చెదనన్న

మతము ఒక్కటి యున్న మరియేది ఫలితము

 ***

విరహమోపలేక వెదకు చుండగ నిన్ను

వేరు వాకిలిదీసి వెడలిపోతివి గాదే

విడువలేక మనసు వెక్కి వెక్కి యేడ్చె

అతిసయోక్తి గాదే యిది యమరప్రేమ

 ***

                                                                                                        -- రెడ్లం చంద్రమౌళి

                                                                                       పలమనేరు

ఆటవెలది పద్య రత్నాలు

ఓం శ్రీ సాయిరాం

ఆటవెలది పద్య రత్నాలు

ఆటవెలది లోన యపురూప పద్యాలు

అమర వలయు నేల కవన మందు

వేమ శతక మందు వెలుగు జూచె నిటుల

సరళ భావ పాద సౌష్ఠవమున 

(ఆటవెలదిని వివరిస్తూ ఈ పద్యం)

  

***

భూమిలోన ఇంత విత్తంబు లేకున్న

ఇంత మొక్క ఎటుల ఎదిగి వచ్చు

మనసులోన ఇంత చిత్తంబు లేకున్న

భక్తి భావమెటుల బయటి కొచ్చు

(భక్తిని వివరిస్తూ ఈ పద్యం)

***

పద్యమనగ నేదొ పదజాల మనుకోకు 

పద్యమనగ తెలుగు పదము విలువ

తల్లి నోట పలికి తరతరాలకు నందె

తెలుగు పద్య మిదియె తెలుసుకొనుము

(తెలుగు పద్యాన్ని వివరిస్తూ ఈ పద్యం)
 

***

అడుగులేసి జూడు అచ్చంగ తెలుగులో

తెలుగు భాష తీపి తెలియు నీకు

అన్య భాష లెన్ని వల్లె వేసిన గాని

తెలుగు విడువ బోకు తల్లి నీకు

(తెలుగు భాషను వివరిస్తూ ఈ పద్యం)

***

చిత్రమైన మనసు చింతలు పదివేలు

మైత్రి జేయు వాని మతము నెరుగు

తలపులెన్నో జేరి తెగిన గాలి పటమై

తలచుకున్న చాలు తరలిపోవు

(మనసును వివరిస్తూ ఈ పద్యం)

***

మసక మసక తెరల మబ్బు తాకిన మంచు

చినుకు చినుకు కలిసి చిలకరించె

విచ్చుకున్న విరుల వెలుగొందె చామంతి

పచ్చగుసిరి కాసి పలకరించె  

(హేమంత ఋతువును వివరిస్తూ ఈ పద్యం)

*** 

పద్యాలు వ్రాయడం ఏనాడు ఎరుగని నాచే ఆ సాయిరాముడు ఇలా పద్యాలు వ్రాయిస్తున్నారు.

రచన
రెడ్లం చంద్రమౌళి

పలమనేరు

హృదయమా మనసు తలుపు తీయకు

ఓం శ్రీ సాయిరాం

హృదయమా మనసు తలుపు తీయకు

హృదయమా మనసు తలుపు తీయకు

ప్రేమలో... తెలిసి నన్ను దించకు

ఊహలో... భావాల్ని రేపకు

ఊపిరే... వారధిగ చేయకు 

***

ప్రేమలోన పడిన మనసు పరవశించిపోవులే

వలపు వానలోన వయసు తడిచిపోవులే

మనసు మాట వినక మనిషే మారిపోవులే

విరహపు నిట్టూర్పుల సెగలు నిన్ను ముంచులే

ఓపగ నావల్ల కాదు వేడుకొందువే

హృదయమందు ప్రేమ గుణము ఎరుగవైదువే

అది చెప్పగ నావల్ల కాదు ఒప్పుకొందువే

చెలియ మనసు ఎరుగలేక చింతపడుదువు 

***

చెలియ కానరాగ మనసే చెప్పలేక

బిడియముతో నోటమాట రాకపోవును

ధైర్యముతో ఎదురుపడి చెప్పనెంచినా

సరే అనునో తమాషనునో ఎరుగలేవుగా

మనసుచెప్పి ఒప్పుకొన్న ప్రేమింతువు

కానరాని లోకములు తిరిగి వద్దువు

ప్రేమలోని మధురిమను చవిచూడగా

హృదయములు ఒక్కటిగా కలిసిపోవును 

***

ప్రేమ వికటమైన కలలే కూలిపోవును

మనసులోన వున్న మమతే మాసిపోవును

ప్రేయసినీ మరువలేక మౌనముగా మిగిలి

ఒంటరిగా వేదనలో కుమిలిపోదువు

కఠినమైన శిలలైనా కరిగిపోవును

కరుణలేని చలియమనసు కరుగలేదుగా

భారముతో భగ్న ప్రేమ హృదయమందునా

చావలేక బ్రతకలేక మిగిలిపోవును 

***

                                                                 --రెడ్లం చంద్రమౌళి 

                                                                                 పలమనేరు