నా రచనలు: లాస్య గీతం

Thursday 10 January 2019

పల్లవి

అరుణబింబ మంబరాన

అతిశయంగ అలసి సొలసి

సంధ్య వేళ సొమ్మసిల్లి

ఛాయ చెంత సేదదీరి

కిరణమొకటి పట్టుదప్పి జారిందంట

శ్రీ దివ్య దోసిట్లో చేరిందంట

||అరుణబింబ మంబరాన||

చరణం 1

స్వాగతాల భంగిమలో సంధ్యకాల వందనాన

సూర్యుడినే హారతిగా ఇస్తూ వుంటే

కృష్ణమ్మ హొయలన్నీ వేళ

తనలోనే పొదిగింది బాల

కెరటాలను తన కాలికి ముడివేసింది

భరతం తన పదమందున ప్రభవించింది

తా...తై... తక... ఝం... ఝం... ఝం...

||అరుణబింబ మంబరాన||

చరణం 2

అభినయించు అంగాంగం రసవిధ్యా సంగమమై

లావణ్యం లాస్యంతో లయమౌతుంటే

కృష్ణమ్మా ఒడిలోనీ వేళ

తాండవమే చేసిందీ బాల

హృదయం పరవశమై తను నర్తిస్తుంటే

చరణం శ్రుతి లయలై నది రవళిస్తుంటే

గీతం... ధ్వనియించింది...

నాలో... జనియించింది...

||అరుణబింబ మంబరాన||

రచన

చంద్రమౌళి రెడ్లం

పలమనేరు

నా రచనలు