విరహ గీతం

ఓం శ్రీ సాయిరాం

విరహ గీతం

పల్లవి:

చిన్నారి సిరిమల్లీ ఎందుదొ జాబిల్లీ

తనజాడ తెలిసే మార్గం చూపించవే

ఇన్నినాళ్ళు ఊరుకుంది వయసు

మౌనమింక సాగదంది మనసు

హెచ్చరికలంపె నాకు ఇపుడు

దారిచెప్పి నీవు సాయపడరావా

నెలరాజా... రాజా... రాజా...

||చిన్నారి సిరిమల్లీ||

చరణం:1

తన్నుతానుగా అందిరాదుగా మనకై చంద్రమా

వద్దచేరి నా విరహవేదన నీవే తెలుపుమా

అదిరి పోవునో బెదిరి పోవునో నిన్నే చూడగా

కుసుమ కోమలి కుశల మడిగి నా మనసే చెప్పుమా

శ్వాసలో శ్వాసనై చేరే వేళకై

ఆశగా ఆమెకై వేచున్నానని

విన్నపాలు విని నన్ను చేరమని విన్నవించి రావా

||చిన్నారి సిరిమల్లీ||

చరణం:2

సగము తానుగా సగము నేనుగా కలిసేదెప్పుడో

జీవితాన నా చేయిపట్టుకొని నడిచేదెెప్పుడో

పాలు నీళ్ళలా పదము భావమై కలిసేదెప్పుడో

అడుగు అడుగునా తోడు నీడగా నడిచేదెప్పుడో

మనసులో మనసువై చేరే నా చెలి

బ్రతుకులో జంటగా తోడుంటావని

తెలుగు భాషలో తీర్చి కూర్చినా తీయనైన లేఖ

||చిన్నారి సిరిమల్లీ||

రచన

రెడ్లం చంద్రమౌళి

పలమనేరు 

బొమ్మ బొరుసు

ఓం శ్రీ సాయిరాం

బొమ్మ బొరుసు (కవిత)

నిజానికి అవి బొమ్మ బొరుసులు

బ్రతుకు నాణానికి...

అయినా అవి జీవితాన్ని నడిపిస్తాయి

నాణెం లోకాన్ని నడిపించినట్లు

***

నిజానికి అవి బొమ్మ బొరుసులే...కానీ

కంటికి కనిపించని వెలుగు నీడలు

జీవితానికి ఎత్తుపల్లాలు

కాల చక్రంతో కలిసినడిచినా

ఒకదానికొకటి ఎదురుపడవు

ఎందుకంటే అవి పాదాల్లాంటివి

పక్కపక్కనే నిలబడ్డా

ఒకదాని వెనకే ఒకటి

రేయింబవళ్ళలా జతపడవు కానీ

ఏ ఒక్కటి లేకపోయినా బ్రతుకు తెలవారదు

*** 

నిజానికి అవి బొమ్మ బొరుసులే...అయినా

అమావాస్య చంద్రుడులా ఒకటి

వసంత భానుడిలా మరొకటి

వంచించినా...వరించినా

నేర్పేది పాఠాన్నే...దిద్దేది జీవితాన్నే

అందుకే అవి నాణానికి బొమ్మాబొరుసులు

బ్రతుకులో కష్టసుఖాలు

అవే మన జీవన ప్రమాణాలు

*** 

రచన

రెడ్లం చంద్రమౌళి

పలమనేరు

మదిగీతం

ఓం శ్రీ సాయిరాం

మదిగీతం

పల్లవి

మనసే కాగితం ప్రేమే కారకం

నీతోడై నడవాలి నా పాళీ

ఇది మదికావ్యం మధుగీతం కావాలి

మౌనంగా ఎదలోనే సాగాలి

చరణం:1

నాలో స్పందన నీవైతే

ఉదయించే ఊహలకు ఊపిరివే

ఊగించేవిలా మది ఉయ్యాలలా

నిన్నే వలచి నన్నే మరచి మురిసేనే కళా

చరణం:2

ఎదుటే లేవని తెలిసినా

నీకోసం ఆరాటం ఆగనిదే

మదిలో రూపమా మెదిలే భావమా

నా పదమందు ఒదిగే భావ కవితా సుందరీ 

గమనిక: ఈ గీతం ఆంధ్రజ్యోతి నవకలం శీర్షికలో ప్రచురించబడినది.

రచన 

రెడ్లం చంద్రమౌళి

పలమనేరు

తెలవారని రేయిని

ఓం శ్రీ సాయిరాం

తెలవారని రేయిని (కవిత)

తెలవారని రేయిని

చిగురంత ఆశ మొలకెత్తి నాలో 

పెనుచీకటంతా పొగమంచులాగ కరిగిందని

తెలవారని రేయిని

***

అరుణోదయాన అమవాస కళ్ళు

తెరతీసి వెలుగే చూడనీ

చంద్రోదయాన నా వాలు కళ్ళు

వెన్నెలతొ వెలుగే నిండనీ

ఆకాశమంత ఆశున్న చాలు 

ఏ చీకటైనా కరిగేనని

తెలవారని రేయిని

***

గుండెల్లొ మంట చల్లార్చుతున్న 

కన్నీటి పరుగు కలకాలం ఉండిపోలేదని

ఇన్నాళ్ళ వ్యధలు కాలాన కరిగి

ఈనాటితో వీడిపోవాలని

మునుపంటి కింద అధరాల బాధ

చిరకాలం నవ్వుకోవాలని

తెలవారని రేయిని

***

అవరోధమున్న నది ఆగుతుందా

ముంచెత్తి వరదై పొంగదా

వెనకడుగు పడిన అల ఊరుకుందా

అలుపంటురాక సాగదా

ఏ గమ్యమైనా నిను చేరుతుందా

వెంటపడి అడుగే వేయక

పరదాలు తీసి పలుకునా

దరిచేరు దారే చూపునా

తెలవారని రేయిని

***

పెనుముప్పు పొంచివున్న

నిను ముంచుకొచ్చిన

చెరగని చిరునవ్వే కదా ఆశన్నది

నడిరేయి ముంచిన

శిశిరాన్ని తుంచిన

బెదరని ధైర్యమే కదా ఆశన్నది

ఏనాడు విడువకు ఆశను నువ్వు

పెదవుల నవ్వులను

చిగురించిన ధైర్యం ఊపిరి తనకు

మరువకు కడవరకు

నమ్మకం నావగా ఆశయం శ్వాసగా

సాగిపో నేస్తమా

తెలవారని రేయిని 

 ***

ఈ కవిత అచ్చంగా తెలుగు అంతర్జాల మాసపత్రికలో ప్రచురించబడినది ఈ కింది లింకులో చూడగలరు 

http://www.acchamgatelugu.com/2017/07/tellavarani-reyini.html 

రచన

రెడ్లం చంద్రమౌళి

పలమనేరు

మనసుపాట మనసా వినవా

ఓం శ్రీ సాయిరాం

మనసుపాట మనసా వినవా

పల్లవి

వేల వేల వందనాలు నీకు 

ఓసి మనసా మాటే వినవా

తోచు మాటలన్ని పాటకూర్చనీవ 

మనసు పాట మనసా వినవా

అనుపల్లవి

ఊహలతో కలలకు రెక్కలు వేయకుమా

చెరిగినవో అతకవు ఆశలు రెేపకుమా

కలను కరిగేవుమా నిజం విను నా మాటలు 

||వేల వేల||

చరణం 1

నిజము మరిచేలా నిలువరించే 

స్వప్నలోకం తలపులే మూయనీ

నిదురలో ఉన్నా నీడలాగే 

వెంటసాగే కలతలే మాయనీ

జ్ఞాపకం నాటిది ఆశయం నేటిది

అనుకుంటూ తనకంటూ మార్గం వేయని

||వేల వేల||

చరణం 2

చిగురు తొడిగేలా చీకటింట

కంటిపాప వెలుతురే చూడని

స్థిరముగా ఉన్న మనసులోకి

మర్గమపుడు అడుగులే వేయని

జీవితం ఆశగా అనుభవం శ్వాసగా

దరిజేర్చే దారులుగా గమ్యం చేరని

||వేల వేల||   

ఈ పాట అచ్చంగా తెలుగు అంతర్జాల మాసపత్రికలో ప్రచురించబడినది ఈ కింది లింకులో చూడగలరు

http://www.acchamgatelugu.com/2017/06/manasu-pata-vinava.html

రచన

రెడ్లం చంద్రమౌళి

పలమనేరు 

మనసు మధనం

ఓం శ్రీ సాయిరాం

మనసు మధనం

అంతరంగం ఆలోచనలో మునిగి

మనసును మధించడం మొదలుపెట్టింది

ఊహల వలయాలు సుడులు తిరుగుతూ

లోతైన అన్వేషణ చేస్తున్నాయి

ఘాఢ నిశ్శబ్ధంలో

తొణికిసలాడుతున్న మనసును

చిలుకుతున్న శబ్ధంలోంచి

అనుబంధాలు బయటపడి

ఆత్మీయ సంకెళ్ళు వేసాయి

మమతానురాగాల కటకటాల వెనక్కి

నన్ను నెట్టాలని

అయినా మధనం ఆగలేదు

స్వప్నసుందరి ప్రత్యక్షమైంది

ప్రణయ కలశంతో

ఆమె అధరామృతాన్ని

నాపై ఒలకబోయాలని

వలపు చిచ్చురగిల్చి

మోహంతో నన్ను దహించాలని

అయినా మధనం ఆగలేదు

అపాయాలు, అన్యాయాలు

ద్వేషాలు, మోసాలు

ఈసడింపులు, ఛీత్కారాలు

నిరుద్యోగం, దారిద్ర్యం

హాహాకారాలు చేస్తూ

మనసును ముసురుకున్నాయి

అయినా మధనం ఆగలేదు

ముసిరిన చీకట్లు మసకబారాయి

తెల్లటి కాంతిపుంజాలు

అంతరంగంపై ప్రసరించి

హృదయ కవాటం తెరుచుకుంది

అక్షర కలశం బయటపడి

ఆ వెలుగు రేఖల తాకిడికి

నాడులన్నీ జాగృతం చెంది

వెన్నుపాములో వణుకుపుట్టింది

మస్తిష్కాన్ని ప్రేరేపించింది

ఉదయించిందొక వాణి

నా మనోవీణా తంత్రుల్ని మీటి మేల్కొల్పుతూ

చేతి వేళ్ళు కదులుతున్నాయి

కాగితంపై నుగ్గులు పెడుతూ

ఏవో దిద్దుకుంటున్నాయి

గీతలతో దారులు వేస్తూ

సమాసం చేస్తున్నాయి స్వభావానుసారం

సంధి చేస్తున్నాయి అటుకి ఇటుకి

అమరిపోతున్నాయి అక్షరాలు

లక్షణాన్ని బట్టి

రూపుదిద్దుకుంటున్నాయి పదాలు

భావాన్ని బట్టి

ఏరుకుంటున్నది కలం కావలసిన వాటిని

చేతి వేళ్ళ నున్నడుమ

పద భంగిమలతో నాట్యం చేస్తూ

అలంకారాలను అందిపుచ్చుకొంది భావం

అంతర్లీనంగా పురుడు పోసుకుని

స్వచ్ఛమైన కళ శ్రీకారం చుట్టుకొని

కవితా శిల్పం

కనుల ముందు సాక్షాత్కారమయింది

రచన

 రెడ్లం చంద్రమౌళి

పలమనేరు

ఇదే మాకు పాళి అదే మా నివాళి (Dedicated To Dr.C.Narayana Reddy)

ఓం శ్రీ సాయిరాం

ఇదే మాకు పాళి అదే మా నివాళి

ఇదో ఇదో గీతము రచించె భావి భారతం

అదో అదో ప్రాభవం తరించె మాతృ భారతం

ఇదో ఇదో గీతము సినారె ఆత్మకంకితం

అదో అదో ప్రాభవం సినారె కల్పనామృతం

గజళ్ళ గమనానివన్నా గేయాల గానాలు విన్నా

కథా కావ్య సాహితి సినారె పాళి సంతకం

భువిలోని  వృత్తాంతమంతా విశ్వంభరాతత్వమన్నా

ప్రకృతే ప్రమాణం దానికి మనిషి జీవనానికి

జరిగే ఘోరాలు విన్నా జనజీవితానివన్నా

ప్రపంచ పదులు నేటికి సమాధానం వాటికి

కొరతెంత కనబడుతు వున్నా సరితూగు విధ్వాంశులున్నా

ఇంకా వెలితి తీరదు సినారె కవిత పారదు

సినారె తెలుగు సాహితి తరాల భవిత వారధి

విశాల భరత జాతికి వరాల వెలుగు సారధి

ఇదే మాకు పాళి అదే మా నివాళి 

రచన

రెడ్లం చంద్రమౌళి

పలమనేరు